قرنتيه

قرنتيه

 
للشاعر/ الأستاذ هاشم صديق

لا دبابة برمائيه

لا جاسوسة مدسوسه

لا غواصة روسيه

لا جندية في حركه

لا مختلسة مال شركه

لا قصفت حدود فشلا

لا كسرت صريف كسلا

ولا معروفة ختميه

قرنتيه

لا صعلوكة لبست شورت

لا بتعرف شنو البظبورت

لا محتاجة جنسيه

هي قايلة النيل سقف بيتا

وقايلة ضفافو محميه

جات منسابه عز الصيف

قايلة الناس بكرمو الضيف

قايلة النيل أمان والقيف

وقايلة الحاضرة عصريه

قرنتيه

جات بصغارا دايرة الخير

لا شافت يفط تحذير

لا نزحت تكوس توزير

لا جاطت حركة السير

لا دارت وسام تقدير

لا مستغله عشرين وش

ولا بتعرف تعيش بالغش

كان محتاجة بس للقش

وجات أحلامها دوغريه

قرنتيه

لا بلعت عديل السوق

لا نضمت بدون طايوق

لا كنزت دهب أو ماس

لا ظلمت بدون إحساس

لا عصرت شباب الناس

لا كتمت على الأنفاس

لا قطعت عشب بي فاس

لا داستنا زندية

قرنتيه

لا دست سلع في الخيش

لا شربت مريسة العيش

لا ضبطوها في التفتيش

لا سجنوها شالو الفيش

لا خانت قسم أوديش

لا اجتمعت بمستر جون

لا أكلت مونة العون

لا سدت علينا الكون

لا سبت كتاب أو دين

لا سامتنا حمرة عين

ولا باعتنا ضهريه

قرنتيه

جات مشتاقة للخرطوم

تزور أحبابها خايفة اللوم

تصيح وتنادي بالحلقوم

جنينة النزهة وين يا زول؟؟

لقت حال الجنينه خلا

حليل زمنها وحليل أهلها

لا قرنتي لا أصله

لا صوت كوكو

لا بغله

لا حلوف

ولا أسداً مهاب بالخوف

لا نمراً يشد الشوف

لا ضل فيل

لا تتيل

جريهو جميل

ولا غزلان ولا طاووس

يباهي النيل

لا زفة طيور ونعام

لا نمراً دفر قدام

كل الشله يا قرنتيه غمضة عين

أحالوهم لصالح عام

تقول الدنيا مهديه!

قرنتيه

جت زي ضيفة ما غاره

لا محتاجة لي فيزا

ولا تصديق على زياره

جات والشوق دموع حاره

تجدد في العيون الشوف

بين توتي وعلالي أبروف

قايله الدنيا لسه سلام

ما خيم زمان الخوف

ولسه هناك ضفاف حره

ما مطمورة للمره

قايله الناس بعزو الضيف

ما بسوقوهو لي حفره

وجوار القيف

ما بيكلوهو في السفره

ومصيرو مخيف

قايله الحاضره ما غابه

وقايله حقوقها محميه

قرنتيه

لا قدلت في شارع القصر

لا حامت في وقت الحظر

لا خشت على المأمور

ولا نطت سلك أو سور

لا دخلت على أمدرمان

ولا كسرت قفل دكان

لا دفرت على التلفاز

لا عضت كراع فنان

لا ذاعت بيان للناس

لا احتلت كمان حيشان

ولا نصبت شبك للحش

جات بصغارا كايسه القش

تلاقي القوت

صبح محظور

وخير البقعه جوا السور

سماحة الدنيا منسيه

قرنتيه

لا بتعرف عجن أو لخ

وجات أحلاما دوغرية

عجب ساقوها جوه الفخ

عجب من طولها وقعت تخ

عجب سلخوها صبحيه

عجب ونحنا بنسلخ الانسان

كيف ما نعذر الحيوان

عجب والدنيا عصريه!!

قرنتيه

لا دبابه برمائيه

لا جاسوسة مدسوسة

لا غواصه روسيه

لا جنديه في حركه

لا مختلسة مال شركة

ولا حزبيه بعثيه

Posted in: ينبوع الشعر السوداني